في بداية كل موسم، بيكون فيه لاعيبة ملكيتهم عالية جدًا، والناس كلها تقريبًا داخلة بيهم، لكن ده مش معناه إنهم أفضل اختيارات.
هنا التقييم مش على أهمية اللاعب لفريقه، لكن على حاجة واحدة، هل يستاهل سعره وقادر يجيب نقاط فانتازي؟
ودي بالنسبة لي أبرز 5 أفخاخ لازم تاخد بالك منها قبل بداية الموسم.
1. سوبوسلاي – £7.0m | ملكية 41%
ملكية مرعبة بصراحة.. تقريبًا نص اللعبة داخلة بسوبوسلاي.
المشكلة إن اللاعب بيلعب في مركز رقم 8، وبالتالي بعيد نسبيًا عن المرمى. صحيح تألق الموسم الماضي في الكرات الثابتة وده ساعده يحقق نقاط، لكن دفع £7.0m للاعب اعتمادك الأساسي عليه يكون من الكرات الثابتة مش أفضل استثمار.
خصوصًا إن ليفربول عنده اختيارات أقوى هجوميًا.
2. ندياي – £6.0m | ملكية 16%
ندياي سجل 6 أهداف فقط الموسم الماضي، وده رقم مش مغري جدًا مقابل سعر £6.0m.
خصوصًا إنك تقدر تروح للاعبين زي هارفي بارنز وكيفن شادي في نفس الفئة السعرية، والاتنين عندهم أرقام هجومية أفضل.
وفوق ده كله، إيفرتون مش من الفرق اللي تتوقع منها إنتاج هجومي كبير.
في نفس السعر، فيه خيارات تقدر تجيبلك نقاط أكتر.
3. إنزو لي في – 6.0m£ | ملكية 11%
هنا الفخ مختلف شوية.
إنزو لي في سجل كل أهدافه الخمسة الموسم الماضي من ضربات الجزاء، وده يخلي الاعتماد عليه فانتازيًا مخاطرة كبيرة.
سندرلاند بيعتمد بشكل أكبر على الأظهرة والمهاجم بروبي في صناعة الخطورة، بينما إنزو لي في وجرانيت تشاكا دورهم الأساسي التحكم في إيقاع المباراة.
يعني ببساطة اللاعب مهم جدًا لسندرلاند، لكن ده مش بالضرورة معناه إنه مهم لفريقك في الفانتازي.
4. تياجو – £8.0m | ملكية 18%
£8.0m سعر كبير على لاعب قدم الموسم الماضي بشكل قوي، لكنه ظهر مع البرازيل بشكل متوسط، والأهم إن سعره ارتفع بشكل يخليه أقل جاذبية.
في الفانتازي، مش بتدفع بس على جودة اللاعب، لكن على القيمة اللي هتاخدها مقابل السعر.
ومع وجود خيارات أرخص زي جواو بيدرو وكالفيرت لوين، صعب أشوف تياجو أفضل استثمار في بداية الموسم.
5. لوك شو – £4.5m | ملكية 22%
يمكن يكون من أكثر الاختيارات المضمونة من ناحية المشاركة، وده السبب الأساسي وراء ملكيته المرتفعة.
لكن لما نبص للفانتازي، الأرقام مش في صالحه.
شو لعب الموسم الماضي بشكل مستمر، ومع ذلك لم يساهم سوى في هدفين، بالإضافة إلى ضعف أرقامه في نقاط المساهمات الدفاعية.
