موسم الفانتازي بدأ، ومعاه بدأ السؤال المعتاد: أختار الـ15 لاعب بتوعي على أي أساس؟
أغلب الناس بتختار لاعيبتها يا إما عشان بتحبهم، يا إما عشان اللاعب داخل الموسم بفورمة، أو تركز جدًا على الجولة الأولى. لكن بصراحة، دي مش أفضل طريقة تبدأ بيها الموسم.
الفكرة الأفضل إنك تبني فريقك على أساس أول 5 جولات، مش أول جولة بس. يعني تختار 11 لاعب ناوي تعتمد عليهم بشكل أساسي، ومعاهم 4 لاعيبة دكة تقدر تدوّر بينهم وقت الحاجة.
الطريقة دي هتخليك تدخل الموسم بهدوء، ومش هتصحى بعد الجولة الأولى تكتشف إن نص فريقك مش عاجبك وتبدأ تفكر في تغييرات كتير. ولو البداية طلعت سيئة، عندك فرصة ممتازة تعمل Wildcard بعد الجولة الخامسة بعدما تكون شوفت الفرق واللاعيبة على أرض الواقع.
مين لازم يكون عندك من الكبار؟
مبدئيًا، صعب جدًا تدخل أول 5 جولات من غير لاعب من مانشستر سيتي، أرسنال، ليفربول، مانشستر يونايتد وتشيلسي؛ لأنهم ببساطة أكبر فرق الدوري وعندهم أعلى احتمالية لإنتاج النقاط.
مانشستر سيتي
هالاند £15.5m إجباري بالنسبة لي، والخيار الثاني اللي أميل له هو سيمينيو £8.5m.
فكرة البداية بثنائي هجومي من السيتي مغرية جدًا، خصوصًا إن الفريق عنده تنوع هجومي ووجود هالاند لوحده عندك مش هيزود من النقط لأنه عند الكل، بينما أفضل الابتعاد عن دفاع السيتي حاليًا لحد ما تتضح الصورة أكثر مع ماريسكا.
مانشستر يونايتد
برونو فيرنانديز £12.0m إجباري أيضًا.
اللاعب أنهى الموسم الماضي بشكل قوي جدًا في صناعة الفرص، خصوصًا بعد عودته لمركزه الأساسي، وكان من أعلى اللاعبين حصدًا للنقاط في النصف الثاني من الموسم.
الخيار الثاني حسب ذوقك: هجوميًا مبيومو £8.0m، ودي بداية مغرية جدًا خصوصًا مع مواجهتي اليونايتد أمام فريقين صاعدين في أول جولتين.
أما لو عايز خيار دفاعي، فلوك شو £4.5m أو ماجواير £5.0m اختيارات مثيرة للاهتمام، وأنا أميل لماجواير بسبب خطورته في الكرات الهوائية واعتماد يونايتد على الكرات الثابتة.
ليفربول
ليفربول عنده اختيارات كتير، لكن المشكلة إن التشكيلة الجديدة لسه مش مضمونة بالكامل.
أنا أميل إلى إيزاك £9.0m باعتباره المحطة الأبرز في هجوم الفريق، وفي الدفاع أحب جدًا جيريمي جاكيه £5.0m بسعر 5 مليون فقط، وده يخليه بديلًا ممتازًا عن فان دايك الأغلى £6.5m.
أرسنال
مش متحمس لفكرة الدخول بثنائي دفاعي من أرسنال في البداية بسبب صعوبة الجدول، ويفضل الاكتفاء بمدافع واحد.
لكن في الوسط، كريستوس تزوليس £6.5m خيار ممتاز في الفئة المتوسطة، خصوصًا مع دوره المتوقع في الجناح الأيسر وتألقه خلال فترة الإعداد.
تشيلسي
بالنسبة لي، جواو بيدرو £7.5m من أفضل اختيارات القيمة مقابل السعر هذا الموسم.
سعره مغري جدًا، وفي نفس الوقت هو من أهم العناصر الهجومية في تشيلسي، ومع ارتفاع أسعار عدد كبير من اللاعبين هتحتاج لاعبين من النوع ده عشان تظبط الميزانية.
أنا شخصيًا أفضل الصبر على اختيار ثانٍ من تشيلسي لحد ما نشوف شكل ثنائية بالمر وروجرز، لكن لو اخترت روجرز فهو اختيار منطقي جدًا في فئته السعرية، مع الأخذ في الاعتبار إنك وقتها بتراهن بشكل أكبر على هجوم تشيلسي.
اختيارات باقي الفرق – منهم عناصر ديفرنشيال
بعيدًا عن الكبار، فيه كام اختيار يستحق النظر:
سندرلاند: جدول ممتاز، ومع فريق يميل للدفاع، بالارد £5.0m اختيار قوي جدًا.
توتنهام: فريق محدش مركز معاه بالشكل الكافي في فترة الإعداد، وريتشارليسون £6.0m ممكن يكون ديفرنشيال خطير لو استمر على مستواه في الوديات.
ليدز: لازم يكون عندك لاعب منهم. هاري ويلسون £6.5m هو الاختيار الأبرز حاليًا، لكن كالفيرت لوين £6.0m مغرٍ جدًا بسبب سعره. الاختيار بينهم يعتمد على احتياجك لـ لاعب وسط ولا مهاجم.
نيوكاسل: هارفي بارنز 6.0m£ هو الخيار الديفرنشيال الأقوى في رأيي، اللاعب أصبح أساسي في الفريق بعد خروج أنتوني جوردون وهو هداف الفريق في البري سيزون، بارنز سجل 7 أهداف الموسم الماضي رغم أنه بدأ أساسي في 19 مباراة فقط.
الدكة.. متصرفش فلوسك عليها
في الدفاع، توماس لاعب كوفنتري £4.0m خيار مناسب.
وفي الوسط، ممكن تعتمد على جروس £5.5m وجوميز £5.0m من برايتون كخيارات رخيصة.
لكن بالنسبة للمهاجم، أنا مش شايف إنك محتاج مهاجم دكة، مع وجود أسماء قوية في الهجوم، الأفضل تستغل ميزانيتك وتبدأ بـ3 مهاجمين أساسيين.
فرق أفضل تبعد عنها في البداية
فولهام: أسوأ جدول تقريبًا، ومعاه خيارات هجومية مش مغرية.
كريستال بالاس: الفورمة مش مطمئنة، والخيارات الجذابة محدودة باستثناء إسماعيلا سار £6.5m.
بورنموث: الفريق داخل مرحلة جديدة مع رحيل إيراولا، وبالتالي الأفضل نستنى شوية قبل ما نراهن على لاعبيه.
